Poesie inedite di Mario Mastrangelo




Ecco alcuni testi inediti del poeta salernitano Mario Mastrangelo

Cu cchesti mmane

Si, roppo, ’o paraviso nunn’ ’o trovo,
piglio e cu cchesti mmane m’ ’o custruisco,
cu pprète trasparente aìzo mure
e cu rriggiòle azzurre l’abbellisco.

E da llà dinto, pe’ nu tiempo eterno,
a te guardà cuntinuamente io resto
e a t’aiutà fino a quanno tu pure
sciuoglie l’ànema toja rint’ ’o cceleste.

CON QUESTE MANI - Se, dopo, il paradiso non lo trovo, / prendo e con queste mani lo costruisco, / con pietre trasparenti elèvo muri / e con piastrelle azzurre l’abbellisco. // E da lì dentro, per un tempo eterno, / a guardarti continuamente resto / e ad aiutarti fino a che tu pure / l’anima tua disciogli nel celeste.


Pasture

Pure tu sì pastore e vaje pascenno
- ma maje te firme e maje truove repuoso -
mmiez’a ’o stupore r’ ’e spazie sulenne
fitto nu gregge r’ombre silenziose.


PASTORI - Pure tu sei pastore e vai pascendo / - ma mai ti fermi e mai trovi riposo - / nello stupore di spazi solenni / un gregge fitto d’ombre silenziose.


’A maggìa r’ ’a notte

’A maggìa r’ ’a notte lenta culla
’e chistu munno addurmuto l’amàca,
piglia ra cielo nu bucàle ’e stelle
e ncopp’ ê suonne nuoste l’arravàca.

LA MAGIA DELLA NOTTE - La magia della notte lenta culla / di questo mondo che dorme l’amaca, / prende da cielo un boccale di stelle / e lo riversa sopra i nostri sogni.


A ’e passe suoje stanche

Penzava a ’o cammino,
a ’e passe suoje stanche
e a ’e juorne felice,
appena na vranca.

AI PASSI SUOI STANCHI - Pensava al cammino, / ai passi suoi stanchi / e ai giorni felici, / appena una manciata.


Mènnole

’E còre songo mènnole
’nt’a ’e cunfiette r’ ’e piette,
e ’o destino ca tene ’o sciato amaro
pe’ s’addulcisce mmocca va sciugliènnole,
ma sulo nu mumento,
po’ cu ’e riente tagliente
maligno a frantumarle se prepara.

MANDORLE - I cuori sono mandorle / nei confetti dei petti, / e il destino che ha l’alito amaro / per addolcirsi in bocca va sciogliendoli, / però solo un momento, / poi coi denti taglienti / maligno a frantumarli si prepara.


Chesto fa nu poeta

Chesto fa nu poeta, ’o ddinto ’e l’ànema
cu ’e stesse mane scòrteca o carezza,
e fa scarfà ’e pparole ca ne nàsceno
attuorno a ’o vampalorio r’’a bellezza.

E QUESTO FA UN POETA - E questo fa un poeta, il dentro dell’anima / con le stesse mani scortica o accarezza, / e fa scaldare le parole che nascono / torno torno a un falò di bellezza.


E già l’autunno

E già l’autunno ce offre stu scenario
ùmmeto e griggio, rischiarato a stiento:
appriesso a ’a lepre ’e na mappata ’e foglie
correno tutte ’e levriere d’ ’o viento.

E GIÀ L’AUTUNNO - E già l’autunno ci offre uno scenario / umido e grigio, rischiarato a stento: / dietro alla lepre d’un mucchio di foglie / corrono tutti i levrieri del vento.

 

MARIO MASTRANGELO È nato nel 1946 a Salerno. Docente in pensione, scrive nel dialetto della sua città ed ha pubblicato le raccolte di poesie: ’E penziere r’ ’a notte (1992), ’E terature r’ ’a mente (1994), ’E ttégole r’ ’o core (1997), ’O ccuttone cu ’a vocca (2000), Addó ’e lume e ’i silenzie (2004) e Si pe’ piacere appena appena parle (2007).